قرار، شیرازی اور زندہ رُود۔۔۔۔۔۔
میرے نانا ایک ایسی شخصیت تھے جن سے مَیں نے بہت کچھ سیکھا۔۔۔۔۔ اُن کی ایک صلاحیت بہت ہی عمدہ تھی۔۔۔۔۔ اسٹوری ٹیلنگ۔۔۔۔۔ اب پاکستانی و ہندوستانی معاشرے میں تو اسٹوری ٹیلنگ یا کہانی سُنانے کو اِک ذرا منفی معنوں میں استعمال کیا جاتا ہے مگر مغربی معاشروں میں تو اِسٹوری ٹیلنگ اِز اَین آرٹ۔۔۔۔۔ جیسے اسٹیو جابز کو ایک بہت بڑا اسٹوری ٹیلر کہا جاتا ہے بلکہ اِسٹیو جابز کی اسٹوری ٹیلنگ کے حوالے سے ایک اور اصطلاح استعمال ہوتی ہے ریئیلٹی ڈِسٹورشن فیلڈ، کہ اِسٹیو جابز کا کرسمہ ہی ایسا تھا کہ وہ باآسانی دوسروں کو اپنے موقف پر قائل کرلیتا تھا جیسے کہ ہپناٹزم۔۔۔۔۔ خیر میرے نانا کے پاس بھی یہ صِفت بڑی مقدار میں تھی کہ کیسے ایک کہانی یا واقعہ سُناتے ہوئے اُس واقعہ یا کہانی میں پوشیدہ پیغام سُننے والوں تک پہنچانا ہے۔۔۔۔۔ آج چونکہ وہ دُنیا سے جاچکے ہیں تو سب سے زیادہ اُن کی کمپنی مِس کرتا ہوں۔۔۔۔۔ دُنیا گھومی ہوئی تھی اور بَلا کا مشاہدہ تھا۔۔۔۔۔ کچھ واقعات اُنہوں نے بہت دفعہ سُنائے، اُن میں سے ایک واقعہ۔۔۔۔۔
میرے نانا کے والد کافی امیر شخص تھے۔۔۔۔۔ تقسیم کے بعد میرے نانا اپنی بیوی کے ساتھ پاکستان آگئے اور یہاں کوئی چھوٹا موٹا کام کرنا شروع کیا مگر وہ نہیں چلا۔۔۔۔۔ اپنے ساتھ کچھ پَیسے بھی انڈیا سے لائے تھے مگر کچھ عرصہ بعد وہ پیسے ختم ہوگئے۔۔۔۔۔ میرے نانا نے اپنے والد کو خط لکھا کہ بھئی کوئی کام دھندا نہیں ہے بیوی بچوں کا ساتھ ہے، ذرا مہربانی کریں اور کچھ پیسے بھجوادیں۔۔۔۔۔ کچھ ہفتے بعد میرے نانا کے والد کا کافی مختصر سا خط آیا۔۔۔۔۔ انہوں نے لکھا کہ تیرے بیوی بچے تیری ذمہ داری ہیں میری نہیں۔۔۔۔۔ اور نئے ملک میں کیا صرف تُو ہی ایک ایسا ہے جس کے پاس کچھ نہیں ہے۔۔۔۔۔ پاکستان میں بہت سے ایسے ہیں جن کی حالت تیرے سے بھی بُری ہے۔۔۔۔۔ خود کوئی کام دھندا ڈھونڈ اور اپنے بیوی بچوں کی ذمہ داری اُٹھا۔۔۔۔۔ اور آئندہ مجھے کبھی پَیسوں کیلئے خط نہیں لکھنا صرف اپنی خیر خیریت کیلئے لکھنا۔۔۔۔۔ اب نانا بتاتے تھے کہ یہ خط پڑھ کر میرے نانا کو بڑا غصہ آیا۔۔۔۔۔ پَیسے تو بھیجے نہیں اُلٹا چار باتیں الگ سُنادیں۔۔۔۔۔ نانا بتاتے تھے مجھے کافی دن اپنے والد پر شدید غصہ رہا۔۔۔۔۔ مگر خیر محنت مزدوری شروع کی چھوٹے موٹے کام کئے(بتاتے تھے کہ حیدرآباد میں اُس زمانے میں دریائے سندھ پر کوئی پُل بنایا گیا تھا اُس کے پتھر مَیں نے بھی ڈھوئے تھے)۔۔۔۔۔ اور پھر آہستہ آہستہ مالی لحاظ سے اوپر جاتے چلے گئے۔۔۔۔۔ مگر اِس خط والے قصے کے بیس تیس چالیس سال بعد جب یہ قصہ ہمیں سُناتے تھے تو کہتے تھے اگر اُس وقت میرے ابا مجھے پیسے بھیج دیتے تو پھر مجھے کبھی پیسے کمانے نہیں آتے۔۔۔۔۔ وہ خط مجھ پر میرے باپ کا بہت بڑا احسان تھا۔۔۔۔۔ اگر میرے ابا وہ خط نہیں بھیجتے تو مَیں شاید کبھی نہ سیکھتا۔۔۔۔۔
یہ قصہ اُنہوں نے ہمیں بہت دفعہ بتایا کہ ہمارے دماغوں میں نقش ہوگیا۔۔۔۔۔
کچھ ایسا ہی معاملہ ابھی کچھ مہینوں پہلے میرے ساتھ بھی ہوا۔۔۔۔۔ میری بیوی ابھی کچھ مہینوں پہلے ہی ہمارے ساتھ ہمارے کام میں شامل ہوئی ہے۔۔۔۔۔ خیر کام کے حوالے سے اُس کی تربیت شروع ہوئی۔۔۔۔۔ ایک دِن اُس کو ہماری ایک دکان پر آنا تھا۔۔۔۔۔ اور مَیں اُس دن اُسی دکان پر تھا۔۔۔۔۔ میرے اور میری بیوی کے درمیان طے ہوگیا تھا کہ اتنے بجے وہاں پہنچنا ہے۔۔۔۔۔ لیکن وہ اللہ کی بندی آدھا پون گھنٹہ تاخیر سے پہنچی۔۔۔۔۔ وہ شاید سمجھ رہی تھی کہ تاخیر سے پہنچنا کوئی مسئلہ نہیں کیونکہ میرے شوہر کا بزنس ہے اور وہ خود ہی تو وہاں پر ہے۔۔۔۔۔ لیکن جب تاخیر سے پہنچی تو دکان میں داخل ہونے کے بعد وہیں کھڑے کھڑے وَرک اَیتھکس کے حوالے سے اُس کی ذرا کلاس لی اور اُلٹے قدموں واپس گھر بھیج دیا کہ تمہاری ضرورت نہیں ہے۔۔۔۔۔ اُس نے بڑی معافی تلافی کرنے کی کوشش کی مگر مَیں نے اُس کو واپس بھیج دیا۔۔۔۔۔ وہ بجائے گھر جانے کے دو گھنٹے پارک میں جا کر آنسو بہاتی رہی۔۔۔۔۔ مگر اُس دن کے بعد اب وہ کام پر تاخیر سے نہیں پہنچتی۔۔۔۔۔ اُس دن اُس کو اِس طرح کام کے حوالے سے سخت سُست کہنا میرے لئے بھی مشکل کام تھا مگر مَیں نے سوچا کہ اگر آج مَیں یہ نہیں کروں گا تو کل کو کوئی اور میری بیوی کو اِس حوالے سے سُنائے گا لہٰذا یہ گناہِ کبیرہ اپنے سَر ہی لے لوں۔۔۔۔۔
مَیں اور میرا ایک عزیز ترین دوست بہت سارے معاملات میں بالکل ایک جیسی سوچ رکھتے ہیں۔۔۔۔۔ اب بچوں کی پرورش کے متعلق بھی ہم دونوں کے خیالات بہت یکساں ہیں۔۔۔۔۔ میرے تو کوئی بچے وغیرہ نہیں ہیں مگر میرے اُس دوست کے دو چھوٹے بچے ہیں۔۔۔۔۔ ہم لوگ کہیں باہر پارکس یا ٹریکنگ ہائکنگ کیلئے جاتے ہیں یا گھر میں بھی ہوتے ہیں تو بچوں پر زیادہ پابندیاں نہیں لگاتے کہ یہ نہیں کرو وہ نہیں کرو یہاں نہیں جاؤ وہاں نہیں جاؤ ورنہ چوٹ لگ جائے گی گر جاؤ گے۔۔۔۔۔ اب میرا وہ دوست ہو یا مَیں ہوں، ہم دونوں کی بچوں کو گرنے دیتے ہیں(اب کچے دماغ اِس کا مطلب یہ نہ لیں کہ ہم لوگ بچوں کو پل پر سے دریا میں چھلانگ لگانے دیتے ہیں) جبکہ عموماً دیسی ماں باپ ایسا نہیں کرتے۔۔۔۔۔ میرا اور میرے دوست کا نظریہ یہ ہے کہ اگر بچے گریں گے نہیں تو سیکھیں گے بھی نہیں۔۔۔۔۔ لہٰذا دور سے اپنی نگرانی میں بچوں کو گرنے دو، اُن کو چوٹ لگنے دو۔۔۔۔۔ چوٹ وغیرہ لگ جائے گی تو مرہم پٹی کروادیں گے مگر اُس بچے کیلئے اسباق سیکھنے کا جو موقع ہے یہ ضائع نہیں ہونا چاہئے۔۔۔۔۔
کوئی دو سال پہلے مَیں نے ایک صفحہ بنایا تھا۔۔۔۔۔ عنوانِ انجان۔۔۔۔۔ اُس صفحہ میں نصرت جاوید صاحب سے گفتگو کا حوالہ دیا تھا۔۔۔۔۔ نصرت جاوید صاحب سے گفتگو میں اور اُس صفحے کا ایک اہم نکتہ یہی تھا کہ ٹھوکر کھا کر جو سبق سیکھا جاتا ہے وہ سب سے بہترین ہوتا ہے۔۔۔۔۔
اب قرار صاحب نے ہی کافی پہلے ایک دفعہ کہیں ابراہام لنکن کا ایک قول لگایا تھا کہ کسی بُرے قانون کا ختم کرنے کا سب سے بہتر طریقہ یہ ہوتا ہے کہ اُس قانون کو مکمل نافذ کرو۔۔۔۔۔ مجھے اِس سے پہلے ابراہام لنکن کے اِس قول کا علم نہیں تھا مگر مجھے یہ جملہ اور اِس جملے کے پیچھے سوچ بہت زبردست لگی کہ یہ میری سوچ اور نظریات سے بہت مَیل کھاتی ہے۔۔۔۔۔
مگر اب یہاں ایک دلچسپ نکتہ بنتا ہے کہ قرار صاحب نے ابراہام لنکن کا یہ قول لگا تو دیا مگر اِس قول کی جو رُوح ہے اُس پر عمل پیرا ہونے سے گریزاں ہیں۔۔۔۔۔ معلوم نہیں کیوں۔۔۔۔۔
اب معلوم نہیں قرار اور شیرازی آخر کیوں پاکستانیوں کو ٹھوکر نہیں کھانے دینا چاہتے تاکہ وہ پاکستانی بھی سبق سیکھ سکیں۔۔۔۔۔ پہلے بھی اپنے ایک صفحہ پر اپنی ماں کے حوالے سے لکھا تھا کہ دھیمی آنچ میں جو پکتا ہے اچھا پکتا ہے۔۔۔۔۔ آپ کیوں اِس عمل کو پریشر کُکر میں ڈال کر جلدی جلدی مکمل کرنا چاہتے ہیں۔۔۔۔۔ بھئی اگر پاکستانی سمجھتے ہیں کہ فوج کی حکمرانی اچھی ہے تو پھر اُن کو سمجھتے رہنے دیں۔۔۔۔۔ آخر آپ کو یہ نادر شاہی شوق کیوں ہے جو اُنہیں بتا رہے ہیں اور بتاتے ہی چلے جارہے ہیں کہ فوج کی حکمرانی اچھی بات نہیں ہے۔۔۔۔۔ جس دن وہ(پاکستانی) یہ سمجھ جائیں گے کہ فوج کی حکمرانی ایک ناسور ہے تو اُس وقت فوج کی بلا واسطہ و بالواسطہ حکمرانی سے بھی نجات حاصل کرنے کی راہ نکال لیں گے۔۔۔۔۔ اور اگر اُن کو مستقبل میں ایسے وقت فوج سے نجات کی کوئی راہ سُجھائی نہ دے تو وہ ہوسکتا ہے وہ امیریکہ میں بیٹھے قرار اور شیرازی سے مدد طلب کرلیں گے۔۔۔۔۔ اور آپ دونوں اُس وقت پاکستانیوں کو سابقہ وطن کے حوالے سے رعایت کے طور پر اپنے کنسلٹینسی چارجز معاف کر کے ڈھیر سارے مفت مشورے عنایت کردیجئے گا۔۔۔۔۔ کون روک رہا ہے۔۔۔۔۔
مسئلہِ حُب الوطنی
کچھ عرصہ پہلے ایک صفحہ، جنسی حدود و قیود کا ماخذ، پر ایک سوال آیا تھا کہ خونی رشتوں سے مباشرت(اِنسیسٹ) کے متعلق۔۔۔۔۔ حق پرست نے مجھ سے غالباً طنزیہ طور پر پوچھا تھا کہ کیا آپ دے سکتے ہیں اِس سوال کا جواب۔۔۔۔۔
میرا اِس سوال پر جواب اِس نکتہ کے گرد گھومتا تھا کہ دماغ میں انتہائی راسخ ہونے والے تصورات کیسے بنتے ہیں۔۔۔۔۔ اور میرے مطابق اِن معاملات پر کسی کی پسند ناپسند جائز ناجائز اُنہی تصورات کی دَین ہے۔۔۔۔۔ کچھ مثالیں بھی دیں تھیں کہ ہمارے اندر غیرت کا تصور کہاں سے آتا ہے۔۔۔۔۔ شرم کا تصور کیسے آتا ہے۔۔۔۔۔ میرے خیال میں یہ اُس معاشرے کی وجہ سے پیدا ہوتا ہے جہاں کسی نے اپنی ابتدائی عمر بِتائی ہو۔۔۔۔۔ اور میرے خیال میں ایسے تمام تصورات پھر شاید عُمر بھر آپ کے ساتھ رہتے ہیں۔۔۔۔۔
تو یہ جو کم بخت حُب الوطنی ہے میرے خیال میں یہ بھی اُنہی ابتدائی عمر میں قائم ہونے والے تصورات کی پیداوار ہے۔۔۔۔۔
اب اِس نکتہ پر شیرازی اور قرار نے یہاں کافی بچگانہ قسم کی جذباتی باتیں شروع کردیں کہ ہم پاکستان سے نکل گئے لیکن پاکستان ہم سے نہیں نکلا یا بی بی سی اُردو زیادہ پسند ہے بجائے سی این این کے۔۔۔۔۔ اب یہ صرف جذباتیت ہے اور ہمارے یہ دوست اِس صفحہ پر کچھ زیادہ ہی شہنشاہِ جذبات بنے ہوئے ہیں۔۔۔۔۔ ویسے یہاں ایک دلچسپ نکتہ بھی ہے۔۔۔۔۔ کوئی دو سال پہلے مَیں ایسے ہی مادام کو تنگ کررہا تھا اُن کی پاکستان سے محبت کے دعووں پر امیریکا کی شہریت کے حوالے سے ۔۔۔۔۔ اُس تھریڈ کے کچھ کمنٹس پڑھنے کے لائق ہیں۔۔۔۔۔ خاص کر قرار صاحب کے۔۔۔۔۔ معلوم نہیں یہ کایا پلٹ اُن کے خیالات میں کب ہوئی۔۔۔۔۔ اُس تھریڈ میں وہ حُب الوطنی سے متعلق مادام کے خیالات پر نکتہ چینی کررہے ہیں مگر آج مجھ سے بات کرتے کرتے وہ خود کچھ کچھ اب مادام کی جگہ پر پہنچ گئے ہیں۔۔۔۔۔
نادان جی …آپ کافی تضادات کا شکار ہیں …ایک طرف تو آپ کہتی ہیں کہ آپ کا دل پاکستان میں پڑا ہے …لیکن پاکستان میں رہنا بھی نہیں چاہتیں ….کبھی حج پر جانے کے لیے پاکستانی پاسپورٹ بنوانا چاہتی ہیں حالانکہ کہ حج امریکی پاسپورٹ پر بھی ہوسکتا ہے کیا آپ نہیں سمجھتیں کہ آپ نے امریکی شہریت حاصل کرتے وقت سچائی سے کام نہیں لیا تھا …شہریت کا حلف امریکا سے وفاداری کا تقاضا کرتا ہے …ورنہ اگر پاکستان سے ہی اصلی محبت ہے تو گرین کارڈ تک بھی محدود رہا جاسکتا تھا اور امریکی شہریت نہ لیتیں
میری پوزیشن دوہری شہریت پر یہ ہے کہ بعد میں لینے والی شہریت اور حلف پچھلی سے مقدم ہوتا ہے …اسی لئے جرمنی کا امریکا سے معاہدہ ہے کہ جب بھی کوئی جرمن شہری امریکا کی شہریت لیتا ہے …امریکا جرمنی کو اطلاع دیتا ہے اور جرمنی والے اس بندے کی جرمنی کی شہریت کو خود بخود منسوخ کر دیتے ہیں …پاکستان کا ایسا کوئی قانون نہیں لیکن آپ نے سنا ہوگا کہ دہری شہریت والے کو پاکستان کا الیکشن وغیرہ لڑنے کی اجازت نہیں کیونکہ پاکستانیوں کے نزدیک بھی ایسے بندے کی وفاداری مشکوک ہےآپ کے کینیڈا والے بھائی اور اس فورم کے معزز بلاگر اکثر کہتے پائے گئے ہیں کہ وہ صرف روزگار کے لیے کینیڈا میں مقیم ہیں …ایسا نہ ہو تو وہ پاکستان چلے جائیں کیونکہ آپ کی طرح ان کا دل بھی پاکستان میں ہے …جب ان سے یہ پوچھا جاتا ہے کہ حضرت ….آپ کے لیے کینیڈا کا پرمانینٹ ریذیڈنٹ کارڈ ہی کافی تھا …شہریت کی یا حلف کی کیا ضرورت تھی …تو ان سے جواب نہیں بن پاتامیرے ایک دوست کی والدہ امریکا میں ہیں اور وہ اپنے بھائی جو پاکستان میں ہیں کے ساتھ حج کے لیے گئی تھیں …لیکن انہوں نے پاکستانی پاسپورٹ نہیں بنوایا تھا …بہرحال آپ اگر ایسا ضروری سمجھتی ہیں تو ضرور کیجئے
کچھ ایسا ہی معاملہ شیرازی صاحب کا بھی ہے۔۔۔۔۔ مجھے یاد ہے کہ پی کے پولیٹکس پر بھی ایک دو دفعہ ایسی ہی بحث ہوئی تھی تو شیرازی صاحب نے خود باقاعدہ امیریکن شہریت کے حلف کا مَتن لگایا تھا اور اِسی نکتے پر بہت زور دیا تھا کہ امیریکن حلف تو سب سے پہلے پچھلی تمام وفاداریوں کو ختم کرتا ہوں۔۔۔۔۔ لیکن آج وہ کہتے ہیں کہ ہم پاکستان سے نکل گئے ہیں مگر پاکستان ہم میں سے نہیں نکلتا۔۔۔۔۔ اُس ایک پچھلے تھریڈ میں بے چاری مادام کا بھی یہی رونا(کہنا) تھا۔۔۔۔۔ بس یہی کہہ سکتے ہیں کہ رنگ بدلتا ہے آسماں کیسے کیسے۔۔۔۔۔
خیال رہے مَیں بالکل بھی یہ نہیں کہہ رہا کہ اگر آپ نے ایک غیر ملکی شہریت کا حلف اٹھایا ہے تو آپ کو اب اپنے سابقہ ملک کی کچھ ثقافتی اقدار کو اپنانے سے گریز کرنا چاہئے مثلاً آپ کو اب پاکستانی کھانے، پاکستانی موسیقی و ڈرامے، اُردو نثر و شاعری وغیرہ وغیرہ سے مُنہ موڑ لینا چاہئے۔۔۔۔۔ نہیں، مَیں بالکل بھی یہ نہیں کہہ رہا۔۔۔۔۔ بلکہ مَیں تو یہ کہوں گا کہ یہ ایسی مِیخیں(تصورات) ہیں جو آپ کے دماغ میں اندر تک گڑی ہوئی ہیں اور یہ اب اتنی آرام سے باہر نہیں آنے والی۔۔۔۔۔
میرے نانا ایک بات کہتے تھے کہ ایک قسم کی مچھلی کی ایک خاصیت ہوتی ہے کہ وہ مرنے سے پہلے دریا کے بہاؤ کے مخالف تیرتی ہوئی اُس جگہ پہنچتی ہے جہاں وہ پیدا ہوئی تھی۔۔۔۔۔ اُن کا کہنا تھا کہ عموماً انسانوں کے ساتھ بھی ایسا ہی ہوتا ہے۔۔۔۔۔ وہ بھی اپنے بڑھاپے میں اُس جگہ جانا چاہتے ہیں جہاں وہ پیدا ہوئے تھے۔۔۔۔۔ اور خود میرے نانا کا بھی اپنے بڑھاپے میں یہی معمول تھا۔۔۔۔۔ امیریکہ میں اپنی سرجریز(وہ کینسر کے مریض تھے) کروا کر فوراً واپس جودھپور جے پور چلے جاتے تھے۔۔۔۔۔
خیر میرے جاننے والوں میں کچھ ایسے بھی ہیں جنہوں نے برسوں غیر ممالک میں رہائش رکھی لیکن وہاں کی شہریت نہیں لی۔۔۔۔۔ وہ اپنی پاکستانی شہریت پر ہی وہاں رہے۔۔۔۔۔ ایسی ہی ایک مثال تو اِس فورم پر بھی ہے۔۔۔۔۔ بلکہ مَیں تو یہاں تک کہتا ہوں کہ اگر آپ نے غیر ملکی شہریت نہیں بھی لی لیکن اپنی زندگی ایک نئے ملک میں ترتیب دے لی ہے، اپنا سب کچھ ایک نئے ملک میں بَسا لیا ہے تو اپنے پچھلے ملک کو خود ہی ایک فاصلے پر کردیا ہے۔۔۔۔۔ اگر پاکستان کے حالات مشکل تھے برے تھے تو یہ اُس ملک کے شہریوں کا ہی کام ہوتا ہے تو وہ حالات بہتر کرنے کیلئے اپنا حصہ ڈالیں۔۔۔۔۔ لیکن اگر یہ مشکل حالات دیکھ کر آپ وہاں سے نکل(بھاگ) جاتے ہو، اپنی زندگی نئے ملک میں بنا کر آج پاکستان کے حالات پر غمخواری فرمانا میرے خیال میں ذرا ذرا منافقانہ طرزِ عمل ہے۔۔۔۔۔
اگر ایک خاندان میں بھی ایک جوان بیٹا اپنے گھر والوں کو مشکل میں چھوڑ کر کہیں باہر نکل جاتا ہے بجائے اپنی اخلاقی و معاشرتی ذمہ داری کو نبھاتے ہوئے کہ اپنے گھر کو مشکلات سے نکالنے کے۔۔۔۔۔ اب بعد میں وہ بیٹا اگر اپنے گھر اور گھر والوں سے محبت کے دعوے داغنا شروع کردے تو اُس کے باقی گھر والے ہی اُس کو طعنہ ضرور دیں گے کہ تم اُس وقت کہاں تھے جب ہم مشکل میں تھے۔۔۔۔۔ اور اگر اب پاکستان میں رہنے والے پاکستانی یہاں اِس فورم کے غیر ملکی شہریت رکھنے والوں کے پاکستان سے محبت کے دعووں پر سوال اٹھائیں گے تو میرے خیال میں وہ حق بجانب ہیں۔۔۔۔۔
ابھی کچھ عرصہ پہلے ہی میرے ایک دوست سے بات ہورہی تھی۔۔۔۔۔ وہ دوست کافی عرصہ سے پرمننٹ ریزیڈینسی پر تھے مگر غیر ملکی شہریت نہیں لی تھی۔۔۔۔۔ اُس دن بات کرتے ہوئے مجھ سے یہی کہہ رہے تھے کہ اُن کے بیوں بچوں کا بہت دباؤ ہے اُن پر غیر ملکی شہریت لینے کیلئے۔۔۔۔۔ مگر اُن کا کہنا تھا کہ اگر مَیں ایسا کرتا ہوں تو پھر مجھے پاکستان سے ذرا لاتعلق ہونا پڑے گا۔۔۔۔۔ پھر مجھے پاکستان کو، پاکستان میں رہنے والوں کو ایک باہر والے کی نظر سے دیکھنا پڑے گا کیونکہ پھر مَیں اُن(پاکستان اور پاکستانیوں) کا حصہ نہیں رہوں گا اور پھر نہ ہی میرے پاس کوئی جواز ہوگا کہ پاکستان میں رہنے والوں کی مشکلات پر اُس طرح لب کشائی کرسکوں جیسا کہ پاکستان میں رہنے والے پاکستانی کرسکتے ہیں کیونکہ وہ تو وہیں ہیں اور اُس نظام کا حصہ ہیں لیکن مَیں اپنے فیصلے سے اپنے آپ کو اُس نظام سے کاٹ لوں گا۔۔۔۔۔ اور مَیں اپنے دوست کے اِن ڈِلیماز سے متفق تھا۔۔۔۔۔
ابھی کچھ دنوں پہلے مَیں نے یہی بات زیدی صاحب کو بھی لکھی تھی کہ مجھے آپ کے غیر ملکی شہریت کے حلف اٹھانے سے کوئی مسئلہ نہیں ہے۔۔۔۔۔ یہ آپ کی مرضی ہے جس ملک کا یا جس ملکہ کی حفاظت کا حلف اٹھانا ہے، اٹھائیں۔۔۔۔۔ لیکن پھر پیچھے مُڑ مُڑ کر دیکھنا اور آہیں بھرنا میری رائے میں ذرا دو نمبری ہے۔۔۔۔۔ میرے خیال میں یہاں اچھے خاصے افراد نے کبھی بھی پاکستان کی شہریت کا حلف ہی نہیں اُٹھایا ہے کیونکہ یہ شہریت ہمیں والدین کی طرف سے ملی ہے۔۔۔۔۔ لیکن بالغ ہونے کے بعد ہم میں سے جس جس نے اگر کسی دوسرے ملک کی حفاظت کا حلف اٹھایا ہے تو وہی ایک شہریت کا حلف ہی اُن تمام افراد کا اِکلوتا حلف ہے۔۔۔۔۔ اور اُس حلف کی ایک قیمت ضرور ہے۔۔۔۔۔ اور وہ قیمت میری نظر میں پاکستان سے، پاکستانیوں سے، پاکستان کے معاملات و مشکلات سے ایک فاصلے تک لاتعلقی ہے۔۔۔۔۔
تو جس جس نے پاکستان کے علاوہ کسی دوسرے ملک کی حفاظت کا اور جس جس نے جس جس ملکہ سمیت تمام موجودہ و مستقبلیہ آل اولاد کی حفاظت کا حلف اٹھایا ہے لہٰذا وہ پہلے تو ذرا کھلے دل سے یہ تسلیم کرلیں کہ ہماری ذاتی خودغرضی ہماری پاکستان سے محبت پر غالب آئی تھی(یاد رہے کہ مَیں خودغرضی کو گہرا ترین انسانی جذبہ سمجھتا ہوں)۔۔۔۔۔ تو اب یہ باسی کڑی میں اُبال کی طرح پاکستان کی محبت جو یہاں کچھ حضرات میں عود کر آئے چلی جارہی ہے، اُس کو ذرا ایک طرف رکھ دیں۔۔۔۔۔ جس دن آپ نے حلف اٹھالیا تھا اُس دن آپ نے پاکستان سے اپنی محبت کو اُس کی سچی اوقات یاد دلا دی تھی۔۔۔۔۔
اِس موضوع پر عطاء الحق قاسمی کا کچھ لکھا ہوا یاد آرہا ہے، یاد نہیں اُن کا خود کا لکھا ہوا تھا یا پھر کسی اور کے لکھے ہوئے کا اپنے کالم میں تذکرہ کررہے تھے۔۔۔۔۔ کچھ یوں تھا کسی مغربی ملک میں نئے شہریوں کو شہریت دینے تقریب ہورہی تھی۔۔۔۔۔ ایک پاکستانی نوجوان بھی اُن لوگوں میں شامل تھا۔۔۔۔۔ خیر قطار میں کافی لوگ اُس پہلے شامل تھے۔۔۔۔۔ ایک ایک فرد جاتا تھا اور نئے ملک کی حفاظت کا حلف اٹھاتا تھا۔۔۔۔۔ لیکن اُس نوجوان کے اندر ایک بے چینی شروع ہوگئی تھی۔۔۔۔۔ وہ اپنے سامنے لوگوں کو حلف کیلئے جاتے ہوئے اور حلف کے الفاظ ادا کرتے ہوئے دیکھ رہا تھا مگر اُس کے دماغ میں عجیب عجیب خیالات آرہے تھے۔۔۔۔۔ کیونکہ وہ شخص اپنے آبائی وطن سے محبت بھی بہت رکھتا تھا۔۔۔۔۔ خیر اُس قصے کا حاصلِ کلام یہ تھا جب اُس شخص کا نام پکارا گیا تو بجائے وہ اسٹیج کی طرف جانے دوسری طرف مُڑ کر ہال سے باہر نکل گیا۔۔۔۔۔
مشتاق احمد یوسفی نے اپنی کتاب آبِ گم میں اِنہی حوالوں سے اچھا لکھا ہے۔۔۔۔۔۔
لہٰذا اِن باتوں کا اب کوئی فائدہ نہیں ہے کہ ہم پاکستان سے نکل گئے لیکن پاکستان ہم میں سے نہیں نکلتا۔۔۔۔۔ اِس پر میرا کہنا ہے اب خوب کوشش کرکے اُس پرانے پاکستان کو بھی اپنے اندر سے نکالو اور اگر نہیں نکال پارہے تو پھر دوسرے ملک کی شہریت کو واپس کرو اور پاکستان منتقل ہوجاؤ۔۔۔۔۔ اور اگر یہ بھی نہیں کرسکتے تو پھر چُپ ہوجاؤ اور ہر چودہ اگست کو پورا دِن تنہائی میں پاکستان کے مِلی نغمے سُنا کرو(ویسے مَیں بھی ہر چودہ اگست کو ضرور سُنتا ہوں)۔۔۔۔۔ اور اب پاکستان سے محبت کے دعوے کرنے سے پرہیز ہی بہتر ہے۔۔۔۔۔
اب جیسے آپ نے پاکستان کے لبرل حلقوں کی طرف سے یہ آرگومنٹ ضرور سُنا ہوگا۔۔۔۔۔ جب جماعتِ اسلامی و اِسی قبیل کی دیگر مذہبی سیاسی جماعتیں فلسطین یا برما وغیرہ کے معاملے پر جلسے جلوس کرتی ہیں تو لبرل حلقے کہتے ہیں کہ بھئی دوسروں کو فکر بعد میں کرنا پہلے اپنے ملک کی فکر کرو۔۔۔۔۔ مَیں بھی بذاتِ خود اِس تجویز کا کافی حد تک قائل ہوں اور میرے مشاہدے کے مطابق یہاں لکھنے والے لبرل بلاگرز بھی اِس تجویز کے قائل ہیں۔۔۔۔۔ مگر اِس تجویز میں اپنے ملک کا ذکر ہے۔۔۔۔۔ کون سا اپنا ملک۔۔۔۔۔ اپنا ملک تو وہ ہے جس کی حفاظت کا حلف اٹھایا ہے۔۔۔۔۔
میری ٹرانسفورمیشن(بطورِ خاص قرار صاحب کیلئے)۔
میرا ایک پختہ نظریہ ہے کہ معاشروں کو نہیں بدلا جاسکتا صرف لوگوں کا مزاج تبدیل ہوسکتا ہے۔۔۔۔۔ لیکن جب لوگ بدلتے ہیں تو معاشرے خودبخود بدلتے ہیں۔۔۔۔۔
کسی زمانے میں، مَیں بھی لوگوں کو تبدیل کرنے کی کوشش کرتا تھا(اور میرے خیال میں یہاں سب یہی کرتے ہیں)۔۔۔۔۔ مگر کچھ سالوں سے اِس حوالے سے ہاتھ کھڑے کردیے ہیں کہ کسی کو سکھایا نہیں جاسکتا صرف سیکھا جاسکتا ہے۔۔۔۔۔
اِسی طرح پچھلے وقتوں میں، مَیں اتنے بڑے بڑے معاملات بلکہ اپنی اوقات سے بڑے معاملات میں اپنا سَر کھپاتا تھا کہ پاکستان میں ویسا جمہوری نظام کیوں نہیں ہے جیسا مغربی ممالک میں نظر آتا ہے(یاد رہے کہ مغربی ممالک کے سیاست دان اور پاکستان جیسے ممالک کے سیاست دان، ایک ہی تھان کے کٹے ہوئے ہوتے ہیں)۔۔۔۔۔ پاکستان میں مذہب کا چلن اتنا کیوں بڑھ رہا ہے جس کہ وجہ سے اتنے مسائل پیدا ہورہے ہیں، پاکستانی سیکولرازم کو کیوں نہیں اپناتے وغیرہ وغیرہ۔۔۔۔۔ مگر کچھ عرصہ سے یہاں پر بھی تولیہ رِنگ میں پھینک دیا ہے اور پیچھے ہٹ گیا ہوں(یہاں تولیہ رِنگ میں پھینکنے کا مطلب شکست نہیں بلکہ یہ آگہی ہے کہ مجھے یہ مقابلہ کرنا ہی نہیں چاہئے تھا)۔۔۔۔۔ وہی وجہ کہ کسی کو سکھایا نہیں جاسکتا صرف سیکھا جاسکتا ہے۔۔۔۔۔
مجھے کچھ باتیں آشکار ہوتی محسوس ہوئیں کہ مَیں کیوں بلاوجہ اِن معاملات میں اپنا وقت ضائع کرتا رہا۔۔۔۔۔ کچھ ذرا اپنی خود احتسابی کی تو تشخیص یہ ہوا کہ جب میں اِن بڑے بڑے معاملات پر لکھا کرتا تھا تو دراصل ایک عدد تبلیغی کیڑا تھا جو وقت بے وقت کاٹتا تھا۔۔۔۔۔ فورم پر آکر اکثر جو لکھتا تھا درحقیقت وہ اُس کیڑے کے کاٹنے کی رُوداد تھی۔۔۔۔۔ ویسے قرار صاحب کو ابھی بھی وہ کیڑا بُری طریقے سے کاٹ رہا ہے مگر شاید قرار صاحب کو اندازہ نہیں ہے اور وہ اِس کیڑے کی موجودگی کے مُنکر ہیں، مگر خیر کچھ عرصہ میں سمجھ جائیں گے۔۔۔۔۔
تو یہ کچھ کچھ آگہی کا سفر ہوتا ہے میرے خیال میں۔۔۔۔۔ ایک روشنی کے جھماکے جیسا۔۔۔۔۔ جب یہ جھماکہ ہوجاتا ہے تو پہلے آپ اپنے آپ کو دو گالیاں دیتے ہو اور پھر جو سامنے اگلا تبلیغی نظر آتا ہے اُس کو چار گالیاں دیتے ہو۔۔۔۔۔ اور پھر آپ واپس اُس پرانی راہ پر نہیں جاتے۔۔۔۔۔
اور میرے خیال میں انسان کی زندگی کا سفر بھی کچھ ایسا ہی ہوتا ہے۔۔۔۔۔ جوانی میں آپ بہت سا پیسہ کمانے، یا دوسری آسائشوں کے حصول کیلئے نکلتے ہو اور جو ذرا وکھرے ہوتے ہیں اور انقلابی فطرت کے حامل ہوتے ہیں وہ دُنیا کو تبدیل کرنے کیلئے نکلتے ہیں۔۔۔۔۔ مگر اِک عُمر اِن معاملات میں گذار کر احساس ہوتا ہے کہ یہ سب شاید رائیگاں ہی ہے۔۔۔۔۔ کافی سال پہلے کسی نے مجھے دو سطروں پر مشتمل ایک میسج بھیجا تھا۔۔۔۔۔ عمومی طور پر انسانی زندگی کے حوالے سے بہت خوبصورت یہ دو سطریں مجھے کافی سچی معلوم ہوتی ہیں۔۔۔۔۔
۔
حاصلِ زندگی، حَسرت کے سوا، کچھ بھی نہیں
یہ کیا نہیں، وہ ہوا نہیں، یہ ملا نہیں، وہ رہا نہیں
۔
مگر مَیں اپنے لئے یہ نہیں چاہتا۔۔۔۔ مَیں اپنے لئے حَسرتیں نہیں چاہتا۔۔۔۔۔ قرار صاحب کو ایک بات پہلے بھی لکھی تھی۔۔۔۔۔ کہ عموماً توقعات ہمیشہ دُکھ ہی دیتی ہیں۔۔۔۔۔ لہٰذا کیوں پاکستان اور پاکستانیوں کے حوالے اتنی زیادہ توقعات باندھتے ہو کہ پاکستان ایسا ہوجائے ویسا ہوجائے یا پاکستانی یہ کرلیں وہ کرلیں۔۔۔۔۔ یہ اُن(پاکستانیوں) کے مسائل ہیں اُنہیں ہی حل کرنے دیں۔۔۔۔۔ ہم تو ویسے بھی اب ایک درجہ باہر کے لوگ ہیں۔۔۔۔۔ مگر دوسری طرف کا معاملہ بھی سمجھتا ہوں کہ جب انسان ہیں تو جذبات بھی ہوں گے اور لامحالہ توقعات بھی ہوں گی۔۔۔۔۔ مگر اصل نکتہ اِنہی توقعات پر بند باندھنے کا ہے۔۔۔۔۔ ویسے اگر دیکھا جائے تو مَیں جب یہ لکھ رہا ہوں تو یقیناً مجھ میں جذباتی سوچ بھی ہے، کیونکہ اِسی تحریر کا اہم نکتہ یہ ہے کہ لوگ ٹھوکریں کھا کر ہی اپنے وقت پر سیکھتے ہیں، تو پھر مجھے قرار و شیرازی کو یہ سب نہیں لکھنا چاہئے اور چھوڑ دینا چاہئے کہ جب اِن کو سیکھنا ہوگا سیکھ لیں گے، مگر شیرازی و قرار سے دوستی ہے اور دوستی جذباتی حوالوں سے ہی ہوتی ہے۔۔۔۔۔
ایک تبدیلی اور بھی مَیں اپنی طبیعت میں لایا ہوں کہ اب کچھ سالوں سے پاکستانی اخبارات ٹوئیٹر ہیڈلائنز وغیرہ پڑھنا چھوڑ دیے(البتہ ایاز امیر اور نصرت جاوید کے کالمز اور ماضی کے حوالے سے بی بی سی اُردو کے آرٹیکلز ضرور پڑھتا ہوں)۔۔۔۔۔ سیاسی ٹاک شوز تو عرصہ ہوا دیکھنا بند کردیے(مہینوں میں ایک آدھ دیکھ لینا الگ بات ہے)۔۔۔۔۔ میرا اپنا سمجھنا ہے کہ مَیں اب زیادہ خوش رہتا ہوں۔۔۔۔۔ میرے یا کسی اور کے کہنے سے یا لکھنے سے تو پاکستان تبدیل ہونے سے رہا۔۔۔۔۔ بس وہی فیض صاحب والی بات کہ جیسے چل رہا ہے ویسے ہی چلتا رہے گا۔۔۔۔۔ اور وہ جو کہتے ہیں کہ اِف اِٹ اَینٹ بروک، ڈونٹ فِکس اِٹ۔۔۔۔۔۔
ملٹری پر تنقید کا معاملہ
اب قرار، شیرازی اور فورم کے تمام جمہوری عزاداران کا یہ ایک متفقہ اعلامیہ ہے کہ ملٹری پر خوب تنقید کی جائے(قرار نے البتہ ایک جگہ مجھے یہ ضرور لکھا تھا کہ اِس سیاسی کھیل کے عوام سمیت تمام کرداروں پر تنقید کی جائے)۔۔۔۔۔
اب حق پرست و پٹواری جمہوری عزاداران کی تو میری نظر میں دو کوڑی کی وقعت نہیں ہے۔۔۔۔۔ یہ شہنشاہِ منافقین جلتے توے پر بھی بیٹھ جائیں تو مجھے اِن کی بات پر یقین نہیں آنا۔۔۔۔۔ اِن کی بس اتنی ہی اوقات ہے کہ چلتے پھرتے اِن کو ایک دو لگادیے جائیں اور ضمیر پر کوئی بوجھ نہ رکھا جائے۔۔۔۔۔ اب رہ جاتے ہیں شیرازی و قرار۔۔۔۔۔
اب قرار و شیرازی کیوں یہ چاہتے ہیں کہ ملٹری پر تنقید کی جائے۔۔۔۔۔ میرے خیال میں یہ وجہ ہے کہ وہ چاہتے ہیں کہ پاکستان میں بھی مغربی ممالک جیسا نظام قائم ہو، شخصی و معاشرتی آزادیاں ہوں، حکومت کا نظام سیکولر ہو وغیرہ وغیرہ۔۔۔۔۔ بہت ہی عظیم خیالات ہیں یہ اور مَیں بھی اِن سے متفق ہوں کہ کاش پاکستان بھی ایسا ہوجائے۔۔۔۔۔ خیر اِنہی خواہشات کی بناء پر قرار و شیرازی چاہتے ہیں کہ ملٹری پر تنقید کی جائے تاکہ سویلینز کا پلڑا بھاری ہو اور ملٹری پچھلے قدموں پر جائے۔۔۔۔۔
اب اِس مقام پر آکر میرا راستہ اِن دونوں سے مختلف ہوجاتا ہے۔۔۔۔۔
اب مَیں کافی دفعہ یہ بات واضح کرچکا ہوں کہ مَیں پاکستان کو عقلی و منطقی حوالوں سے سابقہ وطن ہی تصور کرتا ہوں، یہ نہیں کہہ رہا کہ پاکستان سے اب کوئی جذباتی وابستگی نہیں ہے، بالکل ہے لیکن مَیں اُس کو اپنے اوپر حاوی نہیں کرتا، ماضی کی ایک رومانوی یاد ہے، وہ رہے گی۔۔۔۔۔ لہٰذا مَیں تو پاکستان سے ایک حد تک لاتعلق ہوچکا ہوں۔۔۔۔۔ مَیں حالات پر اپنی دانست میں اپنا تجزیہ دے سکتا ہوں کہ یہ جو ہورہا ہے اِس وجہ سے ہورہا ہے اور یہ تب تک ہوتا رہے گا جب تک فلاں فلاں چیزیں ہوتی رہیں گی اور اِس کے بعد ذرا محتاط الفاظ میں تجویز دے سکتا ہوں کہ اگر یوں ہوجائے تو معاملات بہتر بھی ہوسکتے ہیں۔۔۔۔۔ لیکن جہاں تک جہادِ اینٹی اسٹیبلشمنٹ میں شرکت کا معاملہ ہے بات کچھ یوں ہے کہ یہ میری اوقات سے اوپر کے معاملات ہیں۔۔۔۔ ویسے بھی جہادِ اینٹی اسٹیبلشمنٹ میں شرکت نہ کرنے کے حوالے سے میرے پاس کافی سارے اَیکزمپشن سرٹیفیکیٹس ہیں۔۔۔۔۔
ایک ایک کر کے گنواتا ہوں۔۔۔۔۔
۔
۔
پہلا تو یہ کہ پاکستان سے کافی حد تک لاتعلق ہوں۔۔۔۔۔
دوسرا یہ کہ پاکستانیوں کو خود ٹھوکر کھا کر یہ سبق سیکھنے ہیں۔۔۔۔۔
تیسرا یہ کہ میرے ذہن میں یہ بہت واضح ہے کہ پاکستانی چونکہ پہلے ہی اپنی ترکیب میں خاص ہیں، اوپر سے مذہب اور جذباتیت کا تڑکہ الگ لگا ہوا ہے تو یہ معاملات کچھ دہائیوں تک تو سلجھتے نظر نہیں آتے لہٰذا میرا اِس معاملے میں کافی ٹھنڈ پروگرام ہے۔۔۔۔۔ لہٰذا اِس جنگ میں تاخیر سے پہنچنے کی گنجائش ہے۔۔۔۔۔ باقی تمام لوگ پورے زور و شور سے اپنا جہادِ اکبر جاری رکھیں۔۔۔۔۔ مَیں بھی آخری وقتوں میں دو چار ملٹری مخالف پوسٹس لکھ کر غازیوں میں شامل ہوجاؤں گا۔۔۔۔۔
چوتھا سرٹیفیکیٹ جو کہ بہت اہم ہے، وہ یہ کہ ہر چیز کی ایک قیمت ہوتی ہے، ملٹری سے آزادی کی بھی ایک قیمت ہوگی، کچھ قربانیاں دینی ہوں گی۔۔۔۔۔ مگر نہیں، میرے کرنٹ اسٹیٹ آف مائنڈ کے حساب سے مَیں یہ قربانیاں نہیں دینا چاہتا۔۔۔۔۔ لہٰذا جب کسی قسم کی قربانیاں بھی نہیں دینا چاہتا تو کیسے اِس جنگِ عظیم میں شرکت کرسکتا ہوں اور پھر کیسے روز روز کا ماتم کروں۔۔۔۔۔
اب چونکہ دانشگردی پر ہر قسم کی دانشوری حلال ہے لیکن مجھے اِس فورم والوں کی ایک خاص قسم کی دانشوری کچھ سمجھ نہیں آتی۔۔۔۔۔ ویسے تو اِس قسم کی دانشوری کو آرم چیئر دانشوری کہا جاتا ہے۔۔۔۔۔ آن لائن معرکہِ حق و باطل برپا کرنا۔۔۔۔۔ ویسے بھی کرونا کی وجہ سے آن لائن پر زیادہ زور ہے۔۔۔۔۔
اِظہارِ رائے کی آزادی
اب جہاں تک قرار صاحب کا فری اِسپیچ کا نکتہ کہ مَیں یعنی بلیک شیپ کیوں اپنی آواز کو خاموش کرنا چاہتا ہوں۔۔۔۔۔
یقیناً مجھے اِس ملک میں، جہاں مَیں رہتا ہوں، اظہارِ رائے کی آزادی مَیسر ہے اور مَیں اگر پاکستانی ملٹری کے خلاف کچھ لکھنا چاہوں تو مجھ پر کوئی روک نہیں ہے۔۔۔۔۔ لیکن مَیں خود اپنے آپ کو سنسر کرتا ہوں۔۔۔۔۔ کافی ساری وجوہات پہلے ہی دے دی ہیں کہ مَیں کیوں ایسا کرتا ہوں۔۔۔۔۔ ویسے بھی فورم پر بیٹھ کر تو صرف آرم چیئر دانشوری ہی فرمائی جاسکتی ہے۔۔۔۔۔
ویسے ہمیں تھوڑا خیال رکھنا چاہئے کہ ہم تو اپنے چسکے کیلئے لکھتے ہیں لیکن ہمارے ساتھ مل کر پاکستان میں بیٹھے کسی شخص نے اُلٹا سیدھا لکھ دیا یا کوئی اور ایسی ویسی حرکت کردی تو پکڑائی میں وہ آسکتا ہے ہم نہیں۔۔۔۔۔ ہمارا تو کچھ نہیں بگڑنا لیکن اُس بندے کی صحیح پھینٹی لگ سکتی ہے۔۔۔۔۔ لہٰذا مَیں یہ کام نہیں کرنا چاہوں گا۔۔۔۔۔ ویسے یہ بابرکت کام اپنے الطاف بھائی بہت خشوع و خضوع کے ساتھ کرتے آئے تھے۔۔۔۔۔ خود ایک محفوظ جگہ بیٹھ کر اپنے بند دماغ کارکنوں کو اشتعال دلاتے تھے پھر پھینٹی بھی اُن فارغ دماغ حق پرستوں کی ہی لگتی تھی، الطاف بھائی کا کچھ نہیں جاتا تھا۔۔۔۔۔
خیر آپ نے بھی یہ نکتہ اٹھایا کہ آپ ناانصافی کے خلاف آواز اٹھانا چاہتے ہیں۔۔۔۔۔ مَیں آپ کو منع نہیں کرتا آپ شوق سے آواز اٹھائیں مگر جیسا کہ پہلے بھی کہا میری اپروچ آپ سے اُلٹ ہے۔۔۔۔۔ اب مثال کے طور پر پاکستان میں بڑھتی ہوئی مذہبی انتہاء پسندی کا معاملہ لے لیں۔۔۔۔۔ آپ اُن کو نصیحتیں کریں گے کہ ایسا نہ کرو۔۔۔۔۔ مَیں کہوں گا تھوڑا اور بڑھاؤ۔۔۔۔۔ آپ کے فرمودات کو وہ ایک کان سے سُن کر دوسرے سے نکال دیں گے لیکن میری ہدایتیں سُن کر کہیں گے یہ بلیک شیپ تو بڑا ہی پیغمبر قسم کا بندہ ہے تب ہی مذہب پر مزید عمل کی ہدایت کررہا ہے۔۔۔۔۔ پچھلے فورم پر میرے مَینٹور ایک پاکستانی فیملی کا قصہ سُناتے تھے کہ وہ لوگ کھانوں میں حرام حلال کے معاملے میں بہت مِین میخ نکالتے تھے کہ اِس ٹیک اوے کا کھانا مکمل حلال نہیں ہے یوں ہے فلاں ہے۔۔۔۔۔ مَینٹور صاحب نے یہ دیکھ کر اُن کے دماغوں میں مزید حلالی حرامی وسوسے ڈالنے شروع کردیے کہ معلوم نہیں اِس ٹیک اوے کے پیزا کا پنیر بھی حلال ہوتا ہے یا نہیں۔۔۔۔۔ یا یہ والا ریستوران واقعی حلال دکان سے گوشت خریدتا ہے وغیرہ وغیرہ۔۔۔۔۔ یعنی وہی ابراہام لنکن والا اُصول۔۔۔۔۔
اب جب آپ اظہارِ رائے کی آزادی کے حوالے سے بات کرتے ہیں تو مَیں آپ کی توجہ مغربی دُنیا کے معاشرے کے ایک اور اہم تصور کی جانب دلاتا ہوں۔۔۔۔۔ شخصی آزادی۔۔۔۔۔
بھئی اگر پاکستان کے لوگ فوجی حکمرانی میں خوش ہیں تو اُن کو خوش رہنے دیں۔۔۔۔۔ کیوں اُن کے رنگ میں بھنگ ملاتے ہیں۔۔۔۔۔ اگر وہ اجتماعی خودکشی کرنا چاہتے ہیں شخصی آزادی کا تصور تو یہ کہتا ہے کہ اُن کو یہ کرنے دو۔۔۔۔۔
کچھ عرصہ پہلے میرا ایک ایرانی دوست جو کہ تہران کا رہائشی تھا، ایرانی ملاؤں کو خوب برا بھلا کہہ رہا تھا۔۔۔۔ مَیں نے اُس سے پوچھا کہ سچ سچ بتانا جب انیس سو اناسی میں امام خمینی مہرآباد ہوائی اڈے پر اُترے تھے تو کیا تمہارے گھر والے بھی اُس جلوس میں گئے تھے۔۔۔۔۔ اُس نے کہا ہاں گئے تھے۔۔۔۔۔ مَیں نے یہی کہا۔۔۔۔۔ بس پھر بھگتو۔۔۔۔۔ اور اگر سبق سیکھ گئے ہو تو آئندہ کسی مُلا کو خوش آمدید کہنے ایئر پورٹ مت جانا۔۔۔۔
اب قرار صاحب ہوسکتا ہے ملٹری پر تنقید کے حوالے سے یہ کہیں کہ مَیں تو تاریخ کے دُرست سمت میں کھڑا ہونے کو کہہ رہا ہوں یا غلط کو غلط کہنے کا کہہ رہا ہوں۔۔۔۔۔
تو بھئی کئی دفعہ کہہ دیا کہ ہاں میری رائے میں بھی یہ غلط ہے۔۔۔۔۔ لیکن کیا اب غلط ہے غلط ہے کی روزانہ صبح سے شام تک تسبیح پڑھنی ہے۔۔۔۔۔ اب آخر کتنی دفعہ کہا جائے۔۔۔۔۔ اب پاکستان کے لوگ نہیں سمجھنا چاہتے تو مَیں کیا کروں۔۔۔۔۔ کیا مجھے پھر ’مجھے ہے حُکمِ اذاں‘ کی عملی تصویر بن جانا چاہئے۔۔۔۔۔
تخلیقی اقلیت
زندہ رُود نے تخلیقی اقلیت کا نکتہ اٹھایا جو معاشرے میں مزاحمت کرتی ہے نئے خیالات لیکر آتی ہے۔۔۔۔۔
مَیں خود بھی تخلیقی اقلیت کے بارے میں کئی دفعہ لکھ چکا ہوں۔۔۔۔۔ اور مجھے بھی آرنلڈ ٹائن بی کا یہ تخلیقی اقلیت کا تصور بہت بھاتا ہے اور اِس تخلیقی اقلیت کی مَیں دل سے قدر کرتا ہوں۔۔۔۔۔ لیکن مَیں اِس تخلیقی اقلیت کا نمائندہ نہیں ہوں۔۔۔۔۔ پیریڈ۔۔۔۔۔ البتہ فورم کے جمہوری عزاداران میری تحاریر کو نظرانداز نہ کر کے مجھے ضرور اِس سنگھاسن پر بٹھانے کی کوشش کررہے ہیں مگر مَیں بھی اڑا ہوا ہوں کہ مَیں اتنے جوگا نئیں جے۔۔۔۔۔ مَینوں بخش دو(سلیم رضا کا کمال کا جملہ تھا)۔۔۔۔۔ خیر مزاح سے قطع نظر مَیں نے جب بھی فورم پر تخلیقی اقلیت کے بارے میں لکھا ہے تو ساتھ کچھ اور بھی لکھا ہے کہ اِس تخلیقی اقلیت کو عموماً وہ معاشرہ کروسیفائی کردیتا ہے۔۔۔۔۔ اور مجھے کروسیفائی ہونے کا کبھی بھی شوق نہیں رہا۔۔۔۔۔ بس نصرت جاوید کے الفاظ میں کہوں تو گوشے میں قفس کے مجھے آرام بہت ہے، اِس فورم کے ایک کونے میں بیٹھ کر دہی کھا رہا ہوں اور مزے میں ہوں۔۔۔۔۔ اب جو جو تخلیقی اقلیت کے نمائندے ہیں، اور جو جو اُن کی تخلیقات ہیں، وہ جانیں اُن کا کام جانے، بڑے لوگ بڑی باتیں۔۔۔۔۔ یاد رہے مَیں کسی کے کام میں مخل نہیں ہورہا اور کسی کی زبان بندی کا نہیں کہہ رہا۔۔۔۔۔ مَیں بالکل بھی یہ نہیں کہہ رہا کہ اگر کوئی اِن تاریک وقتوں میں مزاحمت کررہا ہے تو اُس کو نہیں کرنا چاہئے۔۔۔۔۔ بس مَیں اپنی حیثیت پہنچاننے لگ گیا ہوں۔۔۔۔۔ اور میرے خیال میں زندگی کا ایک اہم مقصد اپنی اوقات پہچاننا ہونا چاہئے۔۔۔۔۔
خواہشات کا مُنہ زور گھوڑا
یہ جو خواہشات کا وحشی گھوڑا ہوتا ہے، یہ بڑی ہی کمینی نسل سے تعلق رکھتا ہے۔۔۔۔۔ اِس گھوڑے کو سُدھانا نہ صرف مشکل بلکہ کچھ کچھ ناممکنات میں سے ہے۔۔۔۔۔ یُو جسٹ کانٹ بریک دَیٹ ہورس، اِیزیلی۔۔۔۔۔ اگر بدقسمتی سے آپ اِس گھوڑے پر چڑھ گئے تو یہ پھر آپ وہاں نہیں جاؤ گے جہاں جانا چاہتے ہو بلکہ وہاں جاؤ گے جہاں یہ گھوڑا جانا چاہتا ہے۔۔۔۔۔ بس آپ اِس گھوڑے کے آگے بے بس ہوجاتے ہو۔۔۔۔۔
اور میرے خیال میں قرار صاحب کا مسئلہ یہی بن چکا ہے۔۔۔۔۔ ویسے تو قرار صاحب کو اب ذرا ذرا عجیب لگتا ہے کہ اگر مَیں واپس اپنی قرار صاحب کے ساتھ ہونے والی معیشت پر بحث کا حوالہ دوں مگر میرے لئے اِس بحث نے بہت مدد کی قرار صاحب کی نفسیاتی حالت کو سمجھنے میں۔۔۔۔۔
خیر ایک دفعہ پہلے بھی آپ کو اِس بابت لکھا تھا۔۔۔۔۔
اور مجھے جو ذرا ذرا اُلجھن ہے وہ یہ کہ آپ خواہشات کے اِس مُنہ زور گھوڑے پر آخر کیوں سوار ہیں۔۔۔۔۔ آپ پاکستانیوں کو اِن کے حال پر کیوں نہیں چھوڑ دیتے۔۔۔۔۔ لیکن آپ نہیں چھوڑ پارہے۔۔۔۔۔ اِسی تحریر میں آپ کو اپنے ذاتی حوالے سے کئی وجوہات بھی بیان کی ہیں کہ مَیں نے ایسا کیا ہے تو کیوں ایسا کیا ہے۔۔۔۔۔
میرے خیال میں یہ صرف تبلیغ کا کیڑا ہے جو کاٹتا ہے۔۔۔۔۔ اور مجھے یہ بھی اندازہ ہے کہ آپ ابھی میری یہ ساری باتیں نہیں مانیں گے۔۔۔۔۔ ایسا کریں میری اِس تحریر کو کہیں محفوظ کر کے رکھ لیجئے گا اور کچھ سالوں بعد واپس دیکھیے گا۔۔۔۔۔ اُمید ہے اُس وقت تک آپ کو یہ بات سمجھ آجائے گی۔۔۔۔۔
میرے خیال میں انسانوں میں نفسیاتی طور پر ایک خواہش بہت گہری ہوتی ہے کہ جو ہمیں بہتر لگتا ہے ہم چاہتے ہیں وہ دوسروں کو بھی بہتر لگے۔۔۔۔۔ ہم اُس وقت دوسروں کیلئے انتخاب کی آزادی(اُن کی اپنی مرضی) کو ذرا پسِ پُشت ڈال دیتے ہیں۔۔۔۔۔ ایک بہت پرانی فرضی مثال دیتا ہوں۔۔۔۔۔ پی کے پولیٹکس پر ضیاء ایم نے میری اِس فرضی مثال کو فلوسوفیکل جمناسٹک کہا تھا جو مَیں اُن کے ساتھ کھیلنے کی کوشش کر رہا ہوں۔۔۔۔۔
آپ کا ایک بہت عزیز دوست ہے جس سے آپ کو بہت محبت ہے۔۔۔۔۔ لیکن دوست اپنی زندگی ختم کرنا چاہتا ہے۔۔۔۔۔ کیا آپ اپنے دوست کو آرام سے خود اپنے ہاتھوں سے زندگی ختم کرنے دیں گے۔۔۔۔۔ مجھے نہیں لگتا۔۔۔۔۔ میرے خیال میں آپ اُس کو حد درجے تک اِس اِقدام سے روکنے کی کوشش کریں گے۔۔۔۔۔ مَیں بھی آپ کی جگہ ہوں تو یہی کروں گا۔۔۔۔۔
کیوں۔۔۔۔۔ یہ جذباتی وابستگی بمقابلہ شخصی آزادی کا معاملہ ہے۔۔۔۔۔ اور میرے خیال میں آپ جذباتی وابستگی کی طرف کھڑے ہوں گے۔۔۔۔۔ اور یقین مانئے مَیں آپ کی پوزیشن پر کوئی تنقید نہیں کروں گا کہ آپ نے کیوں شخصی آزادی کو پسِ پُشت ڈال کر اپنے اُس دوست کو اپنی مرضی کرنے سے روکنے کی کوشش کی۔۔۔۔۔۔ کیونکہ دیکھا جائے تو بالکل یہی کام، یعنی جذباتی وابستگی کی طرف کھڑا ہونا، مَیں بھی یہ تحریر لکھتے ہوئے آپ کے ساتھ کررہا ہوں۔۔۔۔۔ کیونکہ ایک لحاظ سے مجھے آپ کو بارہا لکھنے کی ضرورت نہیں ہے۔۔۔۔۔ جب کبھی آپ کو میرے موقف سے اتفاق کرنا ہوگا اُس وقت آپ کرلیں گے اور اگر نہیں کرنا ہوگا تو نہیں کریں گے۔۔۔۔۔ اللہ اللہ خیر صلیٰ۔۔۔۔۔ لیکن آپ کو لکھ رہا ہوں اور لکھتا ہی چلا جارہا ہوں۔۔۔۔۔ کیوں۔۔۔۔۔ کیونکہ آپ کے ساتھ ایک جذباتی وابستگی ہے۔۔۔۔۔
البتہ پاکستان کے سیاسی حالات کے حوالے سے مجھ میں اور آپ میں ایک ایک فرق ضرور ہے۔۔۔۔۔ خواہش تو ہم دونوں کی ہی ہے کہ پاکستان کے حالات بہتر ہوں، کچھ مغربی ممالک جیسے حالات ہوں وغیرہ وغیرہ اور خواہش رکھنا کوئی جرم نہیں ہے لیکن فرق میری اور آپ کی خواہش کی شدت کا ہے۔۔۔۔۔ مَیں اُس مُنہ زور گھوڑے سے اُتر چکا ہوں مگر آپ ابھی تک سوار ہیں۔۔۔۔۔ سوشلسٹ کمیونسٹ سوچ رکھنے والے افراد کی بھی شاید یہی خواہش ہوتی ہے تمام انسانوں کو پیٹ بھر کر کھانا ملے، تن پر کپڑے ہوں، سَر پر چھت ہو وغیرہ وغیرہ لیکن پھر ہوتا کیا ہے، جب دوسروں کے ساتھ اچھا کرنے کی یہ خواہشات ایک مُنہ زور گھوڑا بن جاتی ہے تو وہ پھر آخر میں مطلق العنانیت ہی رہ جاتی ہے۔۔۔۔۔ پہلے بھی کہیں لکھا تھا کہ ہمدردی کہیں کہیں بڑا کمینہ جذبہ ہوتا ہے۔۔۔۔۔
Qarar, Shirazi, Zinda Rood, shahidabassi
Share
Email
.
