Home Forums Non Siasi گوٹھ علی نواز کی ریاست

  • This topic has 4 replies, 2 voices, and was last updated 1 year, 5 months ago by JMP. This post has been viewed 327 times
Viewing 5 posts - 1 through 5 (of 5 total)
  • Author
    Posts
  • Believer12
    Participant
    Offline
    Thread Starter
    • Expert
    #1
    گوٹھ علی نواز کی ریاست

    وسعت اللہ خان

    گوٹھ علی نواز کے عین سر پہ صبح ساڑھے تین بجے کے لگ بھگ دھماکہ ہوا۔ ریلوے لائن سے ساڑھے پانچ سو گز پرے سوئے ہوئے گھروں کے مرد آواز کی جانب دوڑ پڑے اور پھر آس پاس والے بھی پہنچنے لگے۔
    ریلوے ٹریک کے دونوں طرف الٹی ہوئی مسافر بوگیوں میں پھنسے کچھ انسان مر چکے ہیں، کچھ ذرا دیر میں مرنے والے ہیں۔ جو مر گئے سو مر گئے۔ اب مسئلہ زندگی اور موت کی دوہری رسی پر جھولتے زخمیوں کا ہے۔
    گاؤں والوں کو حالات سمجھنے میں بس چند ثانیے لگے۔ کسی نے کسی سے نہیں پوچھا اب کیا کریں۔ جس کو جو برتن ہاتھ آیا اس میں پانی بھر کے زخمیوں کی پیاس بجھانے چلے آئے۔
    گاؤں کی موٹر سائیکلیں جانے کب ہنگامی ایمبولینسوں میں تبدیل ہو گئیں۔ ان جوانوں کو کوئی تربیت نہیں تھی کہ کس زخمی کو کیسے اٹھانا ہے۔ بس اتنا اندازہ تھا کہ ایک ایک سیکنڈ بھاری ہے۔ ان زخمیوں میں سے جتنوں کو جیسے کیسے قریبی صحت مرکز تک پہنچا دیا جائے تو شاید جان بچ جائے۔
    کچھ نے دیکھا کہ چند بے سدھ مسافر کھلے آسمان تلے پڑے ہیں تو دوڑ کر بستر کی چادریں، اجرکیں، کھیس جمع کر کے لے آئے اور ساکت جسموں پر ڈالتے چلے گئے۔
    پُر تجسس بچے زندگی اور موت کا دلچسپ تماشا دیکھنے کے بجائے جائے حادثہ اور گاؤں کے درمیان جانے کب خود بخود سپلائی لائن بن گئے۔
    عورتوں کے لیے بہت مشکل تھا گھر بار چھوڑ کر لاچاروں کی مدد کے لیے اپنے مردوں کی اجازت کے بغیر نکلنا۔ مگر انھوں نے بھی فوری کام ڈھونڈھ لیا۔
    جتنا آٹا میسر تھا گوندھ کر توا چڑھا دیا۔ پتیلوں میں چائے کا پانی ابلنے لگا۔ شاید مویشی بھی بھانپ گئے تھے کہ آج ان کے دودھ کی سب سے زیادہ ضرورت پڑنے والی ہے۔

    ،تصویر کا کیپشنسکول ٹیچر علی نواز اپنے اہلِ خانہ کے ہمراہ۔ انھوں نے ٹرین کے تصادم کے بعد بچاؤ کی کوششوں میں مدد کی

    گھر کے مردوں کو جس جس میسر اوزار کی ضرورت تھی لڑکیوں نے وہ ڈھونڈھ ڈھونڈھ کر دیے۔ کچھ نوجوان کہیں سے ایک دو کٹر بوگیاں کاٹنے کے لیے بھی لے آئے۔
    بچے بچیوں نے کچے صحنوں میں اور گھر سے باہر درختوں کے نیچے چارپائیاں بچھا کر رلیاں ڈال دیں۔ جانے کب کسے ضرورت پڑ جائے۔
    علی نواز کے گھر میں عورتوں بچوں جوانوں سمیت بارہ جنے تھے۔ اسے سب کو منظم کرنے میں زیادہ سے زیادہ پانچ منٹ لگے ہوں گے۔اس کی بیوی حبیبہ نے باورچی خانے کی کمان سنبھال لی۔
    کتنے گھنٹے وہ باورچی خانے میں رہی یہ تو اسے یاد نہیں۔ بس اتنا یاد ہے کہ روٹیاں بناتے بناتے اور چائے ابالتے ابالتے اس کے ہاتھ سیاہ ہو گئے تھے۔
    چھ سات گھنٹے بعد امدادی ٹیمیں بھی پہنچنا شروع ہو گئیں۔ پھر مقامی میڈیا آنے لگا۔ اب گاؤں والوں کے لیے ایک اور مرحلہ شروع ہو گیا۔ امدادی ٹیمیں ان کی مہمان ہیں۔ اور مہمان کی بھوک پیاس اور آرام کی ضرورت کے لیے پوچھا تھوڑی جاتا ہے۔
    جو تھک جاتا وہ چارپائی پر سستا لیتا۔ چائے تو سب کی سانجھی ضرورت ہے اور کھانا ؟ وہ تو چاہیے ہی چاہیے۔۔ کوئی ٹیم اپنے ساتھ یہ سب تھوڑی لے کر آتی ہے۔
    یہ آپریشن جتنے گھنٹے چلتا رہا چھوٹا سا گوٹھ علی نواز اور آس پاس کے گاؤں اس آپریشن پر اپنی بساط بھر امدادی چھتری بنے رہے۔

    جو وقائع نگار وہاں پہنچے ان میں سے شائد ہی کسی نے اس گاؤں والوں سے ان کا اپنا حال پوچھا ہو۔ ان رپورٹروں کو بس اتنا جاننا کافی تھا کہ ڈہرکی سے پچیس کلومیٹر پرے الٹ جانے والی دو ٹرینیں۔ اتنے ہلاک، اتنے زخمی، فلاں فلاں ادارے کی امدادی سرگرمیاں وغیرہ وغیرہ۔
    چائے کس نے بنائی؟ کھانے کا کس نے پوچھا، پانی کا گلاس کس نے تھمایا۔ شاید ان بیرونیوں کو جائے حادثہ سے رخصتی کے بعد کسی کی شکل تک یاد نہ ہو۔
    ایسے ہر حادثے کا ذمہ دار انسانی غلطی ہے یا تکنیکی خرابی، کسے معطل ہونا ہے، کس کی ترقی ہونی ہے، ورثا کو کتنی رقم ملے گی، کب ملے گی اور کتنی جوتیاں چٹخا کے ملے گی، زخمیوں کا مکمل علاج سرکار کروائے گی کہ یہ زخمی اپنے لیے بازار سے خود نمک خریدیں گے۔
    کس امدادی ٹیم نے جانفشانی دکھائی اور ان میں کون کون آزمائش کی اس گھڑی کا ہیرو ہے۔ آئندہ ایسے حادثات روکنے کے لیے کیا کرنا ہے۔ کیا بتانا ہے کیا کیا چھپانا ہے، حقائق کے دودھ میں کتنا پانی ملانا ہے۔ یہ سب ریاست اور حکومت کے سوچنے کی باتیں ہیں۔ ریاست کچھ کرے نہ کرے سوچتی وافر ہے۔
    کیا بوڑھا علی نواز جانتا ہے کہ اس کے گاؤں سمیت آس پاس کا ہر گاؤں ہیرو ہے؟ اسے ضرورت ہی نہیں جاننے کی۔ یہ وصف تو ہر دیہاتی کے خون میں ہے۔
    علی نواز نے تو یہ بھی نہیں سوچا کہ ایسا اہم کام کرنے سے پہلے پنچائیت کا اجلاس بلانا مناسب رہے گا کہ نہیں، اپنے کھیسے میں ہاتھ مار کر پیسے گننے ہوں گے، اپنے وسائل کی چادر ناپنی ہو گی، افرادی قوت کا جائزہ لینا ہوگا۔
    اسے کہاں معلوم ہوگا کہ فی زمانہ فی سبیل اللہ کام میں ہاتھ ڈالنا ہی کافی نہیں۔ اس کا باقاعدہ اخراجاتی واؤچر بنا کر سرکار کو پیش کیا جاتا ہے۔

    ایسے بے لوث کام کے آغاز سے پہلے یا بعد میں فوٹو سیشن اور دو کالمی خبر کے لیے رال ٹپکانا اور لہک لہک کر انٹرویو کی آس میں کیمرے کا انتظار کرنا اور اپنی مدد کو میڈل کی طرح لہرانا بھی اتنا ہی ضروری ہے۔
    یہ ناخواندہ و نیم خواندہ آسودگانِ خاک بھلا یہ سب چترائیاں کیا جانیں اور سمجھیں۔ انھیں تو بس فطرت نےایک ہی کام سکھایا ہے۔ کوئی مصیبت میں ہو تو پہلے کچھ کر گذرو۔ سوچنے کے لیے زندگی پڑی ہے۔
    یہ وہ وصف ہے جسے سمجھنا اور محسوس کرنا کسی بھی ریاستی بابو اور بابو گیر حکومت کی اوقات سے باہر ہے۔

    سورس

    Believer12
    Participant
    Offline
    Thread Starter
    • Expert
    #2
    شکر ہے اللہ کا ابھی قوم میں ایسے لوگ بھی موجود ہیں جیسے گوٹھ علی نواز کے ہیں
    JMP
    Participant
    Offline
    • Professional
    #3
    شکر ہے اللہ کا ابھی قوم میں ایسے لوگ بھی موجود ہیں جیسے گوٹھ علی نواز کے ہیں

    Believer12 sahib

    محترم

    میں آپ سے اتفاق کرتا ہوں کے ہمیں محترم علی نواز صاحب جیسے لوگوں کی موجودگی کا شکر ادا کرنا چاہے

    معذرت کے ساتھ ایک سوال ہے

    اور جو لوگ محترم علی نواز صاحب جیسے نہیں ہیں اور آپ کی بات سے مھے محسوس ہوا کہ ہمارے ملک میں اکثریت محترم علی نواز صاحب جیسے لوگوں کی نہیں ہہے تو انکی موجودگی کا شکوہ کس سے کریں

    Believer12
    Participant
    Offline
    Thread Starter
    • Expert
    #4

    Believer12 sahib

    محترم

    میں آپ سے اتفاق کرتا ہوں کے ہمیں محترم علی نواز صاحب جیسے لوگوں کی موجودگی کا شکر ادا کرنا چاہے

    معذرت کے ساتھ ایک سوال ہے

    اور جو لوگ محترم علی نواز صاحب جیسے نہیں ہیں اور آپ کی بات سے مھے محسوس ہوا کہ ہمارے ملک میں اکثریت محترم علی نواز صاحب جیسے لوگوں کی نہیں ہہے تو انکی موجودگی کا شکوہ کس سے کریں

    جے بھای یہ آج کی بات نہیں معاشروں میں ہمیشہ سے ہی قحط الرجال کی کیفیت رہی ہے سنا ہے کہ سو سال پہلے کی اخبارات اٹھا لیں تب بھی ایسے ہی مضامین شائع ہوتے تھے کہ ہماری نوجوان نسل بگڑ چکی ہے اس میں پرانی نسل والی اخلاقیات نہیں رہیں۔ یہ اساتذہ کا احترام نہیں کرتے اور فیملی کے بزرگوں کی بجاے دوستوں میں گھومنا پسند کرتے ہیں۔ اس آخری فقرے کو آپ دوستوں کی بجاے اب سوشل میڈیا لکھ دیں۔ پاکستان میں بھی اکثریت کدووں کی ہے اور اچھے لوگ کم ہیں مگر ابھی اچھے لوگ موجود ہیں ختم نہیں ہوے۔ دونوں طرح کے لوگ ہر معاشرے میں ہوتے ہیں تناسب کا فرق ہے۔ میں ناروے میں رہا ہوں وہاں کی نسبت یہاں زیادہ مطلب پرستی دیکھی ہے

    اس کا شکوہ آپ کسی سے بھی نہیں کرسکتے سواے اپنی ذات کے کیونکہ یہ ہم ہی ہیں جو معاشرے ترتیب دیتے ہیں ، ہم اس کا ایک حصہ ہیں ایک اینٹ ہیں

    میں قرآن مجید میں ایک پیغمبر کا واقعہ پڑھ رہا تھا انکی قوم میں سے کوی بھی نیک نہیں رہا تو اللہ تعالی نے اس پیغمبر کو کہا کہ تم اس بستی کو چھوڑ کر چلے جاو اور مڑ کر بھی نہ دیکھنا

    گویا ایک بندہ بھی ایک پوری بستی یا شہر میں ہو تو اللہ تعالی اسے بچا لیتا ہے، اس بندے کی اہمیت کا اندازہ اور اس کواس طریقے سے محفوط کرنا اور عذاب جو آنے والا تھا اس سے بچانا کم از کم میرے لئے ایک بہت ہی خوشگوار قسم کا انکشاف تھا یعنی پورے معاشرے میں صرف ایک بندہ اور اس کی فیملی نیک تھے تو انہیں بھی بچایا گیا تاکہ ان دو چار نیک لوگوں سے دوبارہ جاگ لگے اور مزید نیک لوگ پیدا ہوں یہ نہ ہو کہ باقی بستی کے ساتھ یہ بھی مارے جائیں اور پھر ایک بھی نیک بندہ اس بستی کا نہ ملے

    • This reply was modified 1 year, 5 months ago by Believer12.
    JMP
    Participant
    Offline
    • Professional
    #5
    جے بھای یہ آج کی بات نہیں معاشروں میں ہمیشہ سے ہی قحط الرجال کی کیفیت رہی ہے سنا ہے کہ سو سال پہلے کی اخبارات اٹھا لیں تب بھی ایسے ہی مضامین شائع ہوتے تھے کہ ہماری نوجوان نسل بگڑ چکی ہے اس میں پرانی نسل والی اخلاقیات نہیں رہیں۔ یہ اساتذہ کا احترام نہیں کرتے اور فیملی کے بزرگوں کی بجاے دوستوں میں گھومنا پسند کرتے ہیں۔ اس آخری فقرے کو آپ دوستوں کی بجاے اب سوشل میڈیا لکھ دیں۔ پاکستان میں بھی اکثریت کدووں کی ہے اور اچھے لوگ کم ہیں مگر ابھی اچھے لوگ موجود ہیں ختم نہیں ہوے۔ دونوں طرح کے لوگ ہر معاشرے میں ہوتے ہیں تناسب کا فرق ہے۔ میں ناروے میں رہا ہوں وہاں کی نسبت یہاں زیادہ مطلب پرستی دیکھی ہے اس کا شکوہ آپ کسی سے بھی نہیں کرسکتے سواے اپنی ذات کے کیونکہ یہ ہم ہی ہیں جو معاشرے ترتیب دیتے ہیں ، ہم اس کا ایک حصہ ہیں ایک اینٹ ہیں میں قرآن مجید میں ایک پیغمبر کا واقعہ پڑھ رہا تھا انکی قوم میں سے کوی بھی نیک نہیں رہا تو اللہ تعالی نے اس پیغمبر کو کہا کہ تم اس بستی کو چھوڑ کر چلے جاو اور مڑ کر بھی نہ دیکھنا گویا ایک بندہ بھی ایک پوری بستی یا شہر میں ہو تو اللہ تعالی اسے بچا لیتا ہے، اس بندے کی اہمیت کا اندازہ اور اس کواس طریقے سے محفوط کرنا اور عذاب جو آنے والا تھا اس سے بچانا کم از کم میرے لئے ایک بہت ہی خوشگوار قسم کا انکشاف تھا یعنی پورے معاشرے میں صرف ایک بندہ اور اس کی فیملی نیک تھے تو انہیں بھی بچایا گیا تاکہ ان دو چار نیک لوگوں سے دوبارہ جاگ لگے اور مزید نیک لوگ پیدا ہوں یہ نہ ہو کہ باقی بستی کے ساتھ یہ بھی مارے جائیں اور پھر ایک بھی نیک بندہ اس بستی کا نہ ملے

    Believer12 sahib

    محترم بلیور صاحب

    ہمیشہ کی طرح بہت ہی زبردست بات کی ہے

    میرے سوال کے جواب میں آپکی دلیل راۓ اور تحریر تو کسی اور اعلیٰ معیار کی ہے اور اب تو بات آگے کرنے کا کوئی جواز نہیں رہتا

    بہت ہی زبردست

Viewing 5 posts - 1 through 5 (of 5 total)

You must be logged in to reply to this topic.

×
arrow_upward DanishGardi