روزمرہ زندگی میں ہمیں بُرے اور اچھّے ، دونوں اقسام کے لوگوں سے واسطہ پڑتا ہے- گھر ہو یا دفتر ، بازار ہو یا مسجد ، پارک ہو یا کھیل کا میدان ہر جگہ برے اور اچھّے لوگ پائے جاتے ہیں
روزمرہ تجربات کی بنا پر میں نے بُروں اور اچھّوں کی چہار بیش قدر اقسام کا مشاہدہ کیا ہے جس کی تفصیل احباب کی خدمت میں پیش ہے
١- اے کلاس بُرے
یہ لوگ دراصل اندر سے برے نہیں ہوتے بلکہ درشتگی کا لبادہ اوڑھے ہوتے ہیں- مقصد آپ کی بہتری اور تربیّت ہوتا ہے- ان میں سخت گیر اساتذہ ، انتہائی راست گو لوگ اور بعض اوقات آپ کے اپنے والدین بھی شامل ہو سکتے ہیں
٢- بی کلاس بُرے
یہ بروں کی وہ قسم ہے جنہیں مالی حالات یا ذمہ داریوں نے برا بنا رکھا ہوتا ہے- حالات تبدیل ہوتے ہی یہ اچھے دکھائی دینے لگتے ہیں- ان میں سیکیورٹی سٹاف ، سخت گیر افسر ، چوکیدار ، بس کنڈکٹرز اور قانون نافذ کرنے والے اداروں کے لوگ شامل ہوتے ہیں
٣- سی کلاس برے
یہ وہ برے ہیں جنہیں بچپن سے ہی برا ماحول میّسر آتا ہے اور بڑے ہو کر یہ معاشرے کے منفی کردار بن کر سامنے آتے ہیں- ان میں چور ، ڈاکو ، لٹیرے ، اٹھائی گیرے ، نشئی، اور دیگر مجرمین شامل ہیں- تبلیغ اچھی تربیّت اور کونسلنگ سے انہیں اچھا بنایا جا سکتا ہے
٤- ڈی کلاس برے
یہ بُروں کی وہ بدترین قسم ہے جو تین نسلوں سے بری ہوتی ہے- انہیں دائمی بُرے یا نسلی برے کہا جا سکتا ہے- غرور ، تکبّر ، گمان ان کا طرہِ امتیاز ہوتا ہے اور یہ برے کہلانے میں فخر محسوس کرتے ہیں- ان کے راہِ راست پہ آنے کے امکانات بہت کم ہوتے ہیں- اللہ پاک ان کے سائے سے بھی محفوظ رکھّے- امین
اسی طرح اچھوں کی بھی چار اقسام ہیں
ڈی کلاس اچھّے
یہ وہ اچھے لوگ ہیں جن کے دائیں ہاتھ میں پُھول اور بائیں ہاتھ میں خنجر ہوتا ہے- انہیں بدترین اچھّے کہا جا سکتا ہے اور منافقت کے اعلی ترین درجے پہ فائز ہوتے ہیں- ان میں زیادہ تر “رشتہ دار” ہوتے ہیں
کلاس سی اچھّے
انہیں طوطا چشم بھی کہا جاتا ہے- پیشہ ورانہ اخلاق کے حامل ہوتے ہیں اور جب تلک آپ سے کام رہے نہایت اچھے رہتے ہیں- کام نکلتے ہی یوں آنکھیں پھیرتے ہیں گویا آپ کو جانتے بھی نہیں- دوکان دار ، ہوٹل کے بیرے ، بزنس مین ، دفتری بابو اور سیاست دان اچھوں کی اس قبیل سے تعلق رکھتے ہیں
کلاس بی اچھّے
یہ اچھّی نسل سے تعلق رکھنے کی بنا پر اچھّے کہلاتے ہیں- انہیں بھلے مانس بھی کہا جا سکتا ہے اور یہ محض اس لیے اچھے ہوتے ہیں کہ برائی پہ قدرت نہیں رکھتے
کلاس اے اچھّے
یہ وہ لوگ ہیں جو محض اللہ کے ڈر سے اچھے بنے ہوتے ہیں- انہیں یقین ہوتا ہے کہ ایک روز انہیں ایک بڑے دن کا سامنا کرنا ہے اور رب تعالی کے سامنے اپنے اعمال کی جواب دہی کرنی ہے- ضروری نہیں کہ یہ عالم و فاضل یا کسی مدرسے کے مہتمم ہوں ، ایک بائیسویں گریڈ کا افسر بھی اے کلاس اچھّا ہو سکتا ہے اور سڑک کنارے بیٹھا ایک جفت ساز بھی- غرض کہ ہر وہ شخص جو اللہ اور یومِ آخرت پہ ایمان رکھتا ہے اور خدا کے سامنے جواب دہی سے ڈرتا ہے اے کلاس اچھا ہے
بشکریہ …… ظفر اقبال محمّد
https://web.facebook.com/ZAFAR.GEE.56211/posts/3097729293818455?__cft__%5B0%5D=AZUZGP9zNVAXDJlFNNhJplsVjndaUkRK2mhUJNO4zempBzBvY-byYUkALfy4zXRu4uJprkkxfL7wCgAufDCFyxYLqG3JExQwe2-w95tj30yLJar3vupK16cxXL4Iuq_0eyw&__tn__=%2CO%2CP-R
بُرے اچھّے
Share
Email. This post has been viewed 479 times
